• Wodhoo7 Translation

شْنُوَّة مَعْنَاهَا خَلِقْ؟ - جزء 7

Updated: Oct 31, 2019

شنوّة هذا الكل؟ ما فمّة كان السينما إلّي تنجّم تعمل هكّة. مانيش قاعد نقول يلزمها تعمل هكّة، إلّي عملوها مرّة ولا ثنين، نجّم نقول بكل بساطة، كانو مخرجين كبار وجاتهم الفكرة. الحكاية موش نقولو هذا إلّي لازم يتعمل ولا لا. لازم يكون فمّة أفكار مهما كان نوعها. هذي فكرة متع سينما هايلة خاطرها تضمن على مستوى السينما، تحوّل في العناصر. سلسلة كاملة متع حاجات تخلّي السينما عندها علاقة بالفيزيك. عمليّة كاملة متع تحوّل، الهواء، الأرض والماء والنار.. خاطر لازم نزيدو (لهنا دولوز يقول إلّي ما عندوش وقت باش يفسّر) نجمو نكتشفو دور الزوز عناصر لخرين، سيركيلاسيون كبيرة متع العناصر هاذم في السينما. إلّي حكيتو الكل، ما يفسّخش حكاية، الحكاية ديما حاضرة. أما إلّي يهمنا، هو علاش الحكاية مهمّة لهالدرجة؟ علاش فمّة هذا الكل وراها؟ السلسلة هذي كيما فسرتها بكري فيسع، الصوت إلي يطلع في نفس الوقت وإلّي يحكيلا عليه قاعد يغطس في التراب. عرفتو أفلام ستروب، هذيكة هي السلسلة متع العناصر عند لي ستروب. ما نشوفو كان الصحرا، أما الأٍض المهجورة هذي كاينها ثقيلة بإلّي موجود تحتها، تنجمو تقولولي "كيفاش نجمو نعرفو؟" هاكة إلّي يحكيلنا فيه الصوت. كاينها الأرض تتحرّك وتموج مع الكلام إلي يتقاللنا وإلي يأخذ بلاصتو تحتها. وقتها، أي ريح يهب على الصحرا، على الفضاء الفارغ إلي تراو فيه، وكل فراغ في الأرض يولي عندو معنى.

© 2019 by Wodhoo7. All Rights Reserved

Get notified of our new articles